Орхон аймгийн баяр наадмын нээлт боллоо

   Монголын тулгар төрийн 2228, Их Монгол Улс байгуулагдсаны 813, Ардын хувьсгалын 98, Орхон аймгийн 43 жилийн ойн баяр наадмын үйл ажиллагаа ёслол төгөлдөр боллоо. Баяр наадмын үйл ажиллагааг нээж Орхон аймгийн Засаг дарга бөгөөд Эрдэнэт хотын захирагч Д.Батлут үг хэллээ. Тэрээр хэлсэн үгэндээ: ''Орхон аймаг, Эрдэнэт хотын бүх бодлого, үйл ажиллагааг ''Эрдэнэт хүний хөгжил''-д чиглүүлэн 2017, 2018 оныхоо ажлаар улсын хэмжээнд хоёр жил дарааллан тэргүүн байранд шалгарлаа. Ийнхүү улсын хэмжээнд хоёр дарааллан тэргүүлэхэд аймгийн нийт иргэд, байгууллага аж ахуй нэгжүүд, наадамчин олон та бүхний итгэл сэтгэл, идэвхи санаачлага, бүтээлч хөдөлмөр ихээхэн үүрэг гүйцэтгэсэн. Сайхан Монгол эх орон, амжилт бүтээлийн эзэд Эрдэнэтчүүдээрээ гоёсон энэ наадам өргөн дэлгэр, ёс журамтай, ахмадуудаа хүндэтгэсэн, Эрдэнэтийн гэсэн өнгө төрхтэй, хүүхэд залуучууддаа уламжлал ёс заншил түүх соёлоо түгээсэн, хөдөлмөр бүтээл, ажлын шинэ амжилт, бахархал дурсамжаар дүүрэн байна'' хэмээн онцлов.
   Наадмын нээлтийн эхэнд Монгол Улсын хөдөлмөрийн баатар Түвдэнпунцагийн Нямжав, Монгол Улсын гавьяат эмч Дашийн Лхагва, Атлантын олимпийн хүрэл медальт, жудо бөхийн Ази тивийн анхны аварга, Монгол Улсын гавьяат тамирчин Доржпаламын Нармандах, Монгол Улсын гавьяат багш Сандагийн Мэнджаргал, Монгол Улсын хөдөлмөрийн баатар Дамчаагийн Бямбаа, Үндэсний сурын аймгийн  мэргэн, спортын мастер  Цэгмидийн Ваанчиг, Монгол Улсын харцага, чөлөөт бөхийн спортын мастер Нарангэрэлийн Саранцогт, МУСТА дуучин Даваасүрэнгийн Дагвадорж, шагайн харвааны аймгийн гоц мэргэн Үзмээгийн Сэргэлэнбаатар нар Монгол Улсын төрийн далбаа, Орхон аймгийн болон Эрдэнэт үйлдвэрийн далбааг наадмын тэнгэрт мандууллаа. Тулгар төрийн 2228, Их Монгол Улсын 813, Ардын хувьсгалын 98 жил, Орхон аймгийн баяр наадмын нээлтийг алтан гадас одонт, найруулагч Дагвадоржийн Отгонбаатар найруулж, 300 гаруй хүүхэд багачууд, урлаг соёлын алдартнууд, төрийн байгууллагуудын төлөөлөл нийт 1000 гаруй хүн оролцов.
   Эрдэнэт хотын баяр наадам хүчит 256 бөхийн барилдаанаар үргэлжилж байна.

Э.Мөнх-Уянга
Фото: Б.Баттөгс